Vir alle inligting met betrekking tot COVID-19, besoek die Suid-Afrikaanse Departement van Gesondheid se webblad by www.sacoronavirus.co.za
Screen Size

STUDIENUUS

Is Jy Reg Vir Die Winter Vakansie?

June 05, 2022
Is Jy Reg Vir Die Winter Vakansie?

Dis nou tyd vir 'n winter vakansie. Jou brein het gekrimp tot die grootte van ’n babarosyntjie en die laaste goeie voorstel wat jy gehad het hierdie jaar is dat jou werksplek ’n hond moet kry sodat jy hom tydens lunch kan vryf. Jy is op hierdie stadium net seker oor een ding: die vakansie kan nou maar kom!

Twee weke terug het jy vir jou ’n tweestuk-baaibroek gekoop sodat jy vir die eerste keer sedert die geboorte van jou kinders, jou midrif op Diaz-strand kan wys. Jy en jou maag weet jy gaan nie in hom pas nie, maar wie nie “maag” nie wen nie, of hoe?

Die gym-instrukteur het jou verseker as jy van nou af tien dae ’n week oefen behoort jy voor die begin van die vakansie bobene te hê.

Uiteindelik breek die groot dag aan. Die kar het nog nie eers derderat getref nie, toe begin dit. Jaco Junior het sopas sy ontbyt met die agterste sitplek gedeel, Jacomien se pop kraam en Esmé wil nóú weet waar kom babas vandaan (jy wonder ook, want hierdie drie op die agterste sitplek was beslis nie jou idee nie).

“Hoe ver is dit nog?!” skree jou jongste.

Dis verder as wat jy wil hê dit moet wees. Dis dít. Volgende kwartaal kamp ons in die agtertuin!

Skielik lui die foon. Dis jou skoonsuster.

“Ek hoor julle is op pad Hartenbos toe? Ag, hoe lekker!”

Hier kom dit nou.

“Hoor hier skoonsus, jy weet mos nou maar hoe benoud raak Kobus se kant van die familie tydens familie funksies. Ons het gedink ons kom sommer ook deur Hartenbos toe vir die vakansie dan hou ons ’n lekker groot familie-wegbreek. Ons kan sommer almal julle gazebo deel.”

Ja, daar ís ’n rede hoekom die woord “breek” in “familiewegbreek” is.

Jy dink aan verskonings. Ons hond kan nie die spanning hanteer nie, groot groepe mense op een plek hou ’n brandgevaar in en die pot waarin jy jou groetesop gaan maak, is net groot genoeg vir tien mense, nie elf nie.

Dis alles tevergeefs, dink jy. Vanjaar merk die vyfde jaar in ’n ry wat jou familie hulself na jou winter vakansie nooi. Die vyfde jaar in ’n ry wat hulle jou tentpenne leen. Volgende jaar hierdie tyd boek jy jouself in in ‘n kothuis in die platteland in Spanje. Niemand sal jou daar kry nie.

Jy slaan jou dagboek tevergeefs oop. 

Ai … dis laat.

Gekry op www.afrikaans.com

© 2022 Studiemeester - Alle regte voorbehou.  |  Privaatheidsbeleid  |  Vrywaringsklousule  |  Terme & Voorwaardes